Todolos artigos de: Somos Maioría Vilagarcía de Arousa

Asemblea de Somos Maioría – 13 de novembro de 2014

O pasado xoves 13 de novembro, ás 20:00 h., celebrouse no Auditorio de Vilagarcía unha nova asemblea local das persoas asinantes do Manifesto Somos Maioría en Vilagarcía de Arousa.

A asemblea realizouse arredor da seguinte

ORDE DO DÍA

1. Avaliación do acto público de presentación do 30 de outubro.

2. Información sobre as conversas cos distintos colectivos e partidos políticos.

3. Rogos e preguntas.

Antes de comezar a asemblea, un dos asistentes comentou a posibilidade de mudar as xuntanzas para os mércores pola imposibilidade de asisitir en xoves. Acordouse preguntar a través do mail polo día  máis axeitado para facilitar a asistencia do maior número de asinantes posible. 

Igualmente, polo feito de contar coa presenza de xente que aínda non asistira a ningunha xuntanza, fíxose un resumo das reunións e dos actos nos que participara Somos Maioría desde a súa aparición en Vilagarcía en agosto.

1. Avaliouse o acto da presentación pública moi positivamente, tanto pola asistencia ao mesmo, como pola cantidade de preguntas que se lle fixeron aos membros da mesa.

2. Informouse das últimas xuntanzas con colectivos, da asistencia ao acto das ANPAS de alumnado con diversidade funcional, así como da conversa mantida con membros de Podemos. Destacouse tamén que aínda non foi posible ter unha entrevista con Compromiso por Galicia pois dita formación non ten militancia organizada en Vilagarcía. Polo que respecta ao Espazo Ecosocialista, ao día da asemblea, aínda non contestaran ao convite.

 3. Neste punto falouse do convite feito a Somos Maioría para participar nunha mesa redonda con outros colectivos que están tamén impulsando candidaturas cidadás

ACORDOS DA ASEMBLEA

  • Continuar cos contactos con distintas asociacións. En canto aos partidos políticos, comezarase a partir de agora coas reunións coas formacións políticas que xa teñen representación no Concello. Propúxose tamén solicitar unha reunión co responsable local de Cáritas, co colectivo Arousa en Bici e coa asociación de comerciantes.
  • Aprobouse a proposta de dar a coñecer o noso traballo e o noso ideario político na rúa mediante unha campaña sinxela en papel para poder chegar dese xeito a xente que non é habitual das redes sociais e a Internet.
  • Elaborar unha nota de prensa informativa e de solidariedade cos traballadores de Lantero.
  • En canto á participación no acto público sobre os movementos cidadáns ao que está convidado Somos Maioría, decidiuse participar na mesa redonda e propúxose que quen participe sexa unha persoa que o faga en representación de todas as asembleas locais de Somos Maioría na Comarca do Salnés.

Sen máis asuntos que tratar, pechouse a asemblea ás 21:50 h.

 

 

Noxo!

A palabra é esa: noxo. Ese vocábulo é o que expresa o sentimento que manifestamos as cidadás e cidadáns de Vilagarcía ante a última agresión da dirección de Lantero aos dereitos máis elementais dos seus traballadores.

Ante a unión dos empregados, ante a paciencia estoica que amosan e coa que responden ás afrentas por parte da dirección, esta ameaza con presentar un E.R.E. máis duro e aínda ten o descaro de inventar unha escusa peregrina para despedir a Jesús López, presidente do Comité de Empresa. E o peor de todo e que tal despido, a día de hoxe, aínda non lle foi notificado ao propio traballador, que soubo do mesmo pola prensa. Non é só que estean cometendo unha nova inxustiza desde a dirección, senón que ademais están dando unha mostra de inhumanidade absoluta.

E mentres, os traballadores seguen aí, loitando polos seus dereitos contra a chuvia, contra o frío, enfrontándose a unha dirección á que lle debía caer a cara de vergonza polo que está facendo, unha dirección que atopa, xa non só nos traballadores de Lantero, senón en toda a xente de Vilagarcía, un sentimento que se pode resumir nunha frase ben clara: Dan vostedes noxo!

Somos Maioría as persoas que desexamos que esta situación surrealista remate pronto, que as reivindicacións dos traballadores teñan cabida no ideario dun equipo de dirección decimonónico e que acabe dunha vez este pesadelo que vive o tecido industrial en Vilagarcía.

Ánimo, Jesús! Ou todos ou ningún!

Todas e todos somos Lantero, contra cans e pistolas!

Manifestación Lantero 6 novembro 2014 1

Este pasado xoves 6 de novembro, demostrando que somos unha vila solidaria, a cidadanía de Vilagarcía tomou as rúas para manifestarse pola defensa dos postos de traballo, pero especialmente do colectivo de traballadores de Lantero.

Unha marea de xente fixo un percorrido por varias rúas baixo unha chuvia e un vento que non daban tregua, pero que non foron quen de frear esta manifestación que tivo o seu momento máis importante nunha ateigada Praza da Peixería, onde se xuntaron os colectivos de traballadores e traballadoras manifestantes (Lantero, Cuca, persoal de ambulancias, etc.) e onde viron o apoio que lles amosaron as cidadás e os cidadáns de Vilagarcía de Arousa.

Alí tomaron a palabra os representantes dos traballadores de Lantero, que agradeceron o apoio de Vilagarcía e demostraron o seu bo talante, mesmo cando desde a empresa os acusan tan inxustamente. A frase dun dos representantes,  despois de case un mes de folga e de acampamento ás portas da factoría,  é un verdadeiro lema desta reivindicación: “Contra os cans e as pistolas, nós respondemos con aplausos“.

Ánimo, compañeiras e compañeiros, sabedes que contades co apoio de Vilagarcía, porque para isto, coma para tantas cousas, SOMOS MAIORÍA!

Tamén somos maioría apoiando a prensa local!

10606252_382800008536760_63896475455413408_n

Porque unha sociedade sen información non sería unha sociedade; porque xa abonda de pechar medios de comunicación, de manipulalos…

Porque queremos que as traballadoras e traballadores dos medios vexan remunerado o seu labor cun salario digno, no que se reflictan as horas extraordinarias que fan cada día, e sobre todo cun salario pagado sen demoras continuas.

Porque cremos que os medios de comunicación locais son os que,  por seren máis cercanos, poden reflectir dun xeito moito máis fidedigno as novas que se producen máis preto.

Por todo iso é polo que chamamos á cidadanía de Vilagarcía e de todo o Salnés a mobilizarse contra unha situación insostible no Diario de Arousa, onde a xente que alí traballa leva uns atrasos nos cobros imperdoables, onde o E.R.E. ao que está sometido o cadro de persoal provoca problemas económicos graves.

Esta mañá, a solidariedade que caracteriza á cidadanía de Vilagarcía ante casos así levou a que se producise unha boa mostra de apoio aos traballadores e traballadoras do Diario de Arousa nunha concentración que, contra vento e marea, tivo lugar na Praza de Galicia. Xornalistas doutros medios, representantes políticos e de colectivos sociais, así como xente a título particular, apoiamos coa nosa presenza as reclamacións que se fixeron nesa concentración.

Desde Somos Maioría Vilagarcía queremos facer un chamamento á poboación de Vilagarcía para que siga participando nestas concentracións se, por falta de solución a este problema por parte da empresa, se volvesen convocar.

Vilagarcía, 3 de novembro de 2014.

ACTO DE PRESENTACIÓN DE SOMOS MAIORÍA VILAGARCÍA

Imaxe: Rubén Domínguez

Tal e como se anunciara nos medios, o pasado xoves 30 de outubro tivo lugar na Sala de Conferencias do Auditorio de Vilagarcía o acto de presentación pública do movemento Somos Maioría Vilagarcía.

O acto contou coa presenza de Mar Catarina Serantes e Miguel Pernas, dúas das persoas que promoveron e foron das primeiras en asinar o manifesto, e de Gaspar Somoza, membro de Somos Maioría Vilagarcía.

En primeiro lugar falou Mar Catarina Serantes, que fixo un breve resumo das actividades iniciais do movemento, principalmente centrada no seu ámbito de traballo, que son as redes sociais. Así mesmo, tamén deu a súa visión do manifesto deste o punto dunha rapaza nova, e fixo fincapé na situación laboral complicada que ten a xente da súa idade.

A continuación, Miguel Pernas deu unha visión máis centrada no ideario político do manifesto, nas súas orixes e nos motivos que levaron á súa aparición na escena política galega, onde a xente reclama cada vez máis de viva voz movementos coma Somos Maioría.

Por último, o compañeiro de Vilagarcía Gaspar Somoza fixo unha crítica á política municipal do Partido Popular e IVIL e realizou un resumo da actividade do grupo local de Somos Maioría desde a súa formación no mes de agosto.

Para rematar, houbo un debate moi participativo onde boa parte do público asistente comentou a súa visión e estableceuse un diálogo moi construtivo sobre as posibilidades de formar unha candidatura de unidade cidadá para as vindeiras eleccións municipais de maio de 2015.